Łod 19 listopada do 18 grudnia to je nojlepszy czas na sprzedowani bez zajty w internecie. Przeżyli my dwa tydnie gryfnych ofert na Godne Świynta. Przed marketerami nojwiyncyj roboty bez ty nostympne dwa tydnie. Co złonaczyć, coby się pokozać lepij niż konkuryncjo i te hołdy e-maili kiere wpodajom do krzinek naszych klijyntów?

Podug badania Deloitte latoś we Gody wydomy ło 5 proc. wiyncy geltu niż w 2015 roku, z czego 44 proc. pódzie na gyszynki. A z analizy zrychtowanej bez serwis zrabatowani.pl nojbarzij gorki czas przed Godami to je 7 i 6 dziyń roboczy przed Wilijom, kiery latoś trefi 15 i 16 grudnia. A przeca momy coroz mynij czasu na lotani po gyszeftach, kaj je zawdy larmo i trza stoć i ciś sie miyndzy ludziami. Toż nojlepij dlo kożdego je, jak se sprawi gyszynki na zajtach gyszeftów w internecie. A idzie to zrobić, jak sie mo trocha czasu, i mało tego, niy trzeja sie nikaj ruszać z chałpy. Toż to je ostatni driker coby poszyrzić nasze działania marketingowe.

Ło czym niy idzie zapomnieć i jak sie pokozać?

Niy bele co, czyli chytej uwaga łodbiorcy

Starej sie łonaczyć co inkszego, niż to, co sie widzi we tych emailach i na bannerach. Niy trzimej sie tego co je, co już wtoś wcześni zrychtowoł. Zrób to inakszyj i podug siebie, coby inksi widzieli, że mosz swoja marka, kiero mo swój cel. Godni łokres to je nojlepszy czas, coby chycić jeszcze wiyncyj kljyntów.  Zadziw klijynta, wymyślej durch, ciś na emocje i starej się być barzij dlo ludzi​.

Darmowo dostawa, e-bony czyli coś dlo tych, co som zalotani, majom mocka roboty, niy poradzom pedzieć, co chcom i niy roz som niyskoro.

Dzisio momy taki czasy, że reklamodawcy starajom sie dować coś wiyncyj niż ino sama reklama. Ale dowani rabatów abo świontecznych geszynków szpecjalnych to je tela co nic. Skisz tego coroz wiyncyj sie widzi, kiej do oferty dociepuje sie wysyłka, za kiero niy trza bulić, abo piykne przystrojyni gyszynku. ​Złonaczyni takij usługi full service je dlo niykierych nojlepszom rzeczom, kiero sie może czowiekowi trefić.

Dlo tych, co niy poradzom sie zdecydować i kupujom na łostatni momynt, nojlepsze som taki gyszynki, kiere sie szumnie mianujom e-bony. Idzie se jich gibko sprawić i komuś podarować – nawet styknie to posłać na krzinka mailowo. A nojważniyjsze w tym je to, że łobdarowany, se potym może wzioś to, co ino mu sie marzi i chciołby mieć. A Ty mosz ło jedna łostuda mynij - niy musisz sie starać, że Twój gyszynk tyn wtośc niy bydzie mioł rod.

Konkursy na Godne Świynta, toż dej swojim klijyntom co wygrać

Kożdy z nos mo uciecha kiej wygrywo roztomajte konkursy, skisz tego Godne Świynta to je nojlepszy czas na zrychtowani takigo świontecznego konkursu z gyszynkami. Je to fajny knif na to coby sie ledy kaj pokozać i chycić jeszcze wiyncyj kamratów i przocieli tego, co łonaczysz. A kaj? No dyć nojlepsze som taki konkursy, co sie roztopiyrzo w social media abo emailowo. Godne Świynta to nojlepszy czas na trzimani sztamy z ludziami, kierzy co łod ciebie bierom. Bydom potym brali jeszcze wiyncyj.

Świontecznie i noworocznie po toniu

Wyprzedaże, rabaty, promocyje to som „marekwie” kampanii mailingowych, kiere zawdy dobrze ściongajom ludziska, toż niy idzie zapomnieć ło nich w łokresie świonteczno noworocznym. Jak w przipadku kożdyj oferty, dej se pozór, czy czas je łograniczony, bo zmotywuje to do kupowanio.  Wkludzyni łokryślonego czasu oferty pokazuje, że trza gibko ciś, coby se coś sprawić. Toż wdycki sie idzie i kupuje.

Rachowani – Gody coroz bliżyj, łostały Ci ino 3 dni

I na som koniec… Rachowani, wiela jeszcze łostało czasu do Godów, może czowieka fest gorszyć, ale z drugij strony ciśnie klijyntów ku kupowaniu, a nojbarzij tych, co majom zawdy ruła. ​Czasu coroz mynij, za tydziyń świynta, łostatni dni na zrychtowani gyszynku Twoim przocielom, łostatni dni wyprzedowanio, to ausdruki, kiere dowane i w tytule brifu i tyż w pojszczodku bydom wymuszać reakcja łodbiorcy.

Momy wiara, że to co my Wom tukyj wytuplikowali, weźniecie se do serca i pokożecie wszyjstko, co ino bydziecie poradzili, coby terozki łoczarować swoich klijyntów